فووووووووو
اطلق الحكم صافرته معلنا بدأ المباراه
(اهو الماتش بدأ....ربنا يستر بقى...الواد الباك ليفت بتاعهم عاش عليا كتير أوى الماتش بتاع الدور الاول)
وانطلق اللاعب بمحاذاة الخط
فوووووووو....فاول
(يادى النيله على الحكام...اى حاجه يصفر...لازم يعرفنا انه موجود يعنى)
(موضوع الحكام ده بقى يقرف..لا ويقولك اصل الحكم بشر..واحنا يعنى اللى ولاد(..) ..ماحنا كمان بشر..انا حاسس انى هاجيب كرش حكم مره وهاقول اصلى بشر)
فوووووو كورنر
(اروح ارفع الكورنر ده يمكن المخفى ده ياخدنى المنتخب..دانا سفيت التراب وعمرى ماشفت المنتخب)
(أنا مش عارف ايه معايير اختياره للمنضمين للمنتخب...دا قبل كاس افريقيا لما اسامه حسنى اتصاب جاب مكانه سمير صبرى يعنى زى اللى باع الميكرويف وجاب
مكانه راديو....يكونوش بيدفعولوا فلوس)
فوووو ..عرقل اللاعب الخصم..فاول
(الواد الباك الشمال بتاعهم ده منه لله...واخدنى فحت وردم...بس ده نادى شركه ...وانا بلعب على اد فلوسى)
(وبعدين كده كده دايما الباك اليمين مظلوم..افهموا يا بشر...الباك اليمين دايما بيبقى قصاده باك شمال ومعظم الماتش بتبقى مباراه جانبيه بينهم وأكيد الاشول احرف
من اللى بيلعب بيمينه..عشان كده الناس بتحس ان مصر مفيهاش باك يمين كويس)
(وبعدين انا شوط جنب الجمهور وشوط جنب المدرب...مش زى الهافات ولا الفراوده...بيبقوا بعيييد عن وجع الدماغ ده)
فووووو..اوفسايد على الفريق المنافس
(ههههه...اهى الكوره دى مفيهاش حاجه..انا اللى مغطى الاوفسايد هههههه...انما الحكم بيريح دماغه..يبص على اللاينمات ويصفر..واللاينمان معندوش
مشاكل...يقول اوفسايد على كوره مفيهاش حاجه محدش هايكلمه..انما لو قال مش اوفسايد على كوره اوفسايد ودخلت جون هايروح فى داهيه..واهو بردو بيشتغل
على اد فلوسه...زمانه بياخد فى الماتش 60 ولا 70 جنيه ويتعشى ويبات فى فندق 4 نجوم...ههههه)
فوووو..ضربة مرمى
(اشطه جدا..اهو الماتش بدأ ياخد المنحنى اللى انا بحبه..ريحنى واريحك....أموت فى الدورى العام)
فوووو...رمية تماس
(مش لاعبها..أحسن يقوللى فاول اوت...دامابيصدق يصفر عشان يعرف لجنة الحكام انه صاحى)
فوووو...انذار للاعب تعثر داخل منطقة الجزاء
(اهو الهبل هايبتدى...الواد اتكعبل ووقع ...ومحدش قال عايزين بلنتى ...انما ده نظام الكوره فى مصر..اللى يتكعبل جوه المنطقه لازم يتجلد الف جلده...واللى مش
عاجبه مايلعبش كوره)
مش فووو.. بس اللاعب تخطى 3 لاعبين دفعه واحده ورفع اوفر بس جت فى العارضه
(يا مسهل ...اهو على بكره ولا بعده بسبب اللعبه دى هلاقى عدلى القيعى والمندوه الحسينى ومش بعيد بتوع انبى كمان هايموتوا بعض عليا..اشطططططه)
الرئيسية 
